一月二十四日本欄提到公益金捐款不足，呼籲大家不妨捐番啲。一位讀者鄭先生來函話：「我於○三年九月二十×日到灣仔公益金總部捐錢，現金七百五十元，發收條之小姐並非無禮，但態度冷淡，一句多謝也欠奉。捐錢後到中環大家樂幫襯一杯奶茶，四蚊，由收銀員到清潔大嬸，對我講咗三次多謝。」
鄭先生捐得七百五十蚊，唔會太在意公益金講句多謝嘅，不過禮多人不怪，市民親身到公益金捐錢，服務人員多謝幾聲又何妨。
中午飲茶之時，律師Ｗ要打心口，原來佢個扶輪社為「護苗基金」籌款，周末有活動，律師Ｗ要我哋速速磅水，於是人人放低紅衫魚兩至五張，但係埋單之時，一齊焗律師Ｗ找晒數，相信佢收埋啲捐款，與張單相差無幾。冇計啦，做得扶輪社、獅子會，就要預咗不停做善事，孤寒嘅，就唔好入會。

捐完錢，有餐飯食，當然係律師Ｗ多謝我哋嘅方法，係今時今日之服務態度。賓架陳諗起灣仔某名店，問我哋去唔去試吓，醫生Ｅ即刻反對。醫生Ｅ話：「今時今日，呢間名店之服務態度點樣過關呀？一位名醫慕名而往，在門口排隊一陣，侍應帶佢去坐在廁所出面嘅枱，你知啦，中式餐廳之廁所通常唔掂，此店大概生意太好，冇人照顧廁所，尿味外溢，名醫急忙要求換枱，夥計唔敢應承，問老闆娘，老闆娘居然大聲講：『邊度重有枱啫，門口有人排緊隊呀，佢唔鍾意就扯啦！』名醫為之氣結，立即鬆人。咁嘅名店，我哋點去呀？」
外滙Ｃ連忙搭口：「唔係噃，我去到好好招呼㗎，枱面鋪白布㖭！」於是大家決定，除非外滙Ｃ請客，否則無謂去灣仔名店。