共享經濟成為趨勢，社創基金專責小組主席張仁良今日就喺滙業財經集團舉辦嘅論壇上，分享心得。

身兼教育大學校長嘅張仁良話呀，由於佢嘅本科係金融，研究範圍除咗金融市場發展，亦專注企業管治、企業社會責任等，可以試試就住社會創新同企業責任角度分享睇法，指共享閑置資源嘅概念，其實喺外國由來已久，例如剪草機同電鋸之類，一年用唔到幾次，如果每家每戶都買一部，就係浪費資源，所以共享經濟實際上係善用資源，而商界喺呢方面嘅參與，相當重要。

而由佢領導嘅社創基金，有別於政府其他支援社企嘅資助計劃，申請資格不限機構或公司，個人都接受，舉例指其中一個創新項目「共享廚房」，會同餐廳合作，畀基層市民喺非繁忙時段使用餐廳廚房設施，製作食物售賣，即係餐會分享佢哋閑置嘅廚房，等「街坊廚師」分享潛藏烹飪手藝，一方面令基層有機會發揮所長，從中賺取收入並建立自信，合作餐廳亦可推出與別不同產品而毋須額外聘用人手，無疑係雙贏。

項目運作逾一年，截至今年七月已有6間餐廳、17位基層人士參與，研發同製作27款新食品，獲逾百萬收入，張校長大讚項目有助鼓勵本地生產，又推動地區經濟，係好有參考價值嘅案例。