韓國女團少女時代（少時）成員允兒噚晚喺亞博館舉行個人粉絲見面會，穿上酒紅色露背連身裙現身，令粉絲非常驚喜。允兒除演唱solo歌《When The Wind Blows》、《To You》晒歌喉外，又唱廣東歌及表演性感舞蹈，大冧港迷。

允兒於台上公開未曝光過嘅相，自爆近來多飲啤酒，前一晚亦有飲啤酒，之後允兒又即場學講廣東話「我愛你」、「心心」、「好可愛」等。

現年28歲嘅允兒，表示2字頭即將結束，想有個完美完結，認為：「30歲前嘅諗法會好辛苦，但之後會輕鬆好多，30歲後會更好更成熟。」

允兒表示之後想飾演有趣嘅角色，提到最鍾意劇集《權慾叛戰》嘅角色，因為挑戰到有別於以往嘅青春活潑形象。

允兒亦表示鍾意歌曲《Mr.Mr.》及《Genie》嘅造型，自爆自己偏好西裝及制服look。另外，因為於歌曲《Party》中染過金髮，啲頭髮傷咗，所以佢要剪短頭髮。允兒坦言其實想留長頭髮，不過為拍戲而要keep住短，估計明年可以留番長。

允兒更特別整咗兩份雞蛋仔，再抽出8名粉絲上台玩做動作猜謎及考心靈相通嘅遊戲。當中有男粉絲趁機表白：「我愛你，允兒。」而貼心嘅允兒，為方便粉絲拎雞蛋仔，穿上貼身裙嘅佢更冇懼走光危機，蹲下拎紙巾畀粉絲，非常體貼。

自認係陳奕迅超級粉絲嘅允兒，於台上表演廣東歌《明年今日》，不過一開始佢似乎有啲唔記得歌詞，表示：「比練習時覺得難咗好多。」之後再唱多次，仲臨時加唱一小段中文歌《對不起謝謝》。另外，允兒更驚喜表演性感舞蹈，又趴地又趷籮，展現性感一面。

尾聲時，允兒表示：「跟大家度過咗好開心嘅晚上，想盡快跟成員一齊嚟見大家。」見到粉絲準備嘅短片，允兒表示：「好鍾意粉絲為我準備嘅短片，再次感謝大家。因為有大家，所以有我喺度。」更用中文講「謝謝」，最後跟粉絲影大合照，更安歌《德壽宮石牆路的春天》及用中文講「小心回家吧」，圓滿結束是次見面會。

精選韓流，喺晒《娛果》
http://fb.com/appledailyent