今日（23號）係任賢齊(小齊)嘅51歲生日，噚晚林建岳博士、杜琪峯導演（杜sir）同埋古天樂為佢舉行生日飯局，大家一齊唱生日歌、切蛋糕兼食壽包，小齊仲收到經理人送俾佢嘅大利是，大家睇到封大利是有成吋厚，但係小齊只係話全部都係港幣，金額就唔肯透露小齊仲話會全數捐俾「鮮浪潮」以行動支持香港電影創作人才。

一直同杜Sir亦師亦友嘅小齊，收到一支簽咗名嘅限量版「杜琪峯酒」做生日禮物，小齊好開心話：「呢支酒咁有紀念價值，我會好好珍藏，好快就成為全球唯一一支，更加珍貴！」佢仲話：「一直以嚟我都係飾演好男人、正派角色，10幾年前杜sir叫我喺《大事件》演大賊喎，當時我話我唔識演，但佢話：『嚟到現場就演到架啦！』結果去到片場有杜sir指導，我真係演到，大家都對我另眼相看。」

小齊又話隔咗幾年杜Sir再搵自己喺《樹大招風》演悍匪，今次唔單只有份提名影帝，仲有好多好多劇本搵我演反派、大賊，證明大家都認同自己嘅演技，小齊覺得好開心！