當年今日

股壇瀏覽器:長科暗盤價大跌

蘋果日報 2002/07/10 00:00


港股噚日成交繼續萎縮,不足50億元,相信與長江生命科技(8222)及中銀香港(2388)兩大吸水機先後啟動有關。不過,大市沽壓輕微,恒指先跌後回升,收報10843,升39點,主要是因為日股造好,升近200點,市場憧憬日本可能於今日公布推出重大經濟措施,挽救經濟,日股後市仍可看好。
長江生命科技噚日截止認購,據聞認購情況唔係太理想,暗盤價大跌至2.30元,估計稍後可能會跌至2元水平。
黑客話,好多落咗大飛嘅客戶正在驚緊,若IPO認購超額不足100倍,大戶可能分到比預期為多嘅長科新股,到時或者迫住首日掛牌就要快手沽貨。據聞有唔少大戶喺暗盤市場以2.50元叫沽,但好似冇人問津。

生科股仔照升
大戶對長科首日表現有所憂慮,其他所謂生物科技股照計應該會受影響,但呢類股份噚日仍各自各精采。宏安(1222)升7.14%;長春達興(8067)升8.5%;金衛醫療(8180)更索性停牌配股集資。市場傳出金衛先舊後新配售最多6000萬股,每股配售價2元,集資1.2億元,配售價較停牌前股價折讓9.1%。集資主要用於收購1項科技項目。
不過,早前傳會借長科上市勁炒嘅生命科技(1180),噚日就軟軟地,收0.32元,跌1.54%,市傳有人對炒家財力有懷疑。
益安國際(082)傳聞想轉型做生物醫藥股,據聞可能會在短期內進行收購,股價噚日升16.2%,似係有大動作先兆。
阿虎