問我鍾唔鍾意睇小說？通常耍手擰頭，但講到由平面變電影，甚至出碟出Game？聽到已口水流！最近有隻《惡魔法則》OnlineGame，佢由同名網絡小說移植過嚟，仲搵咗翻版陳慧琳──Abella，扮演雙重分裂性格嘅女主角，加埋百人混戰搶旗模式，打得熱鬧、有快感！

記者：陳國輝
攝影：譚盈傑

網絡小說　揭隱藏劇情

跳舞嘅《惡魔法則》，喺大陸紅爆小說界！遊戲以忠於原著為為賣點，故事由兩句話可帶出：「神不能給你的，惡魔能給你！」，遊戲世界內，玩家除可用個人方式推動劇情發展，仲有機會揭開原著以外嘅隱藏劇情！

百人血拼搶地

《惡》跟其他OnlineGame一樣，需要玩家選擇騎士、劍士或法師等不同職業，去決定未來！遊戲提供咗九張地圖、共三大關卡，如飛獸、巨龍呢啲Boss梗唔少得！Game內仲特設百人對戰模式，當經驗值達LV60，你就有資格進入榮譽島戰場。實情佢係個死亡孤島，入到去你要同另一Team人血拼，殺得多、領地越多，分數自然多；同時，玩家更可獲個人積分，儲埋走去換件超級裝備！

誠哥做地上最強

遊戲還為玩家提供咗個「榮譽系統」，當你解封咗某項任務，或達成某個條件，電腦會自動幫玩家公告天下，到時人人都識你，仲唔攞晒彩！另外，當完成指定任務後，你仲可為自己冠上鬼馬稱號，當中以誠哥頭像，並寫住「地上最強」呢個名最搞鬼！

百搭裝備唔怕撞

既然係戰爭遊戲，就梗係要不斷強化身上裝備！《惡》提供咗套裝系統，裝備種類多達百幾款，最重要係任你自由配搭，無論樣式、攻擊或者防禦數值，都好難同其他Gamer撞衫；另外，擊敗怪獸後，亦有機會得到「魔核」，裝備好佢，亦可以增強某方面能力。

Profile

平台：PCOnline
類型：角色扮演
推出日期：開始公測
開發公司：北京空中網
代理：Gameone
遊戲官網：
http://em.gameone.com/