當年今日
關於我們

股壇瀏覽器:葉氏似好消息出貨

蘋果日報 2003/06/26 08:00


七一大遊行臨近,阿虎覺得周圍嘅氣氛都好沉重,連一向對政治冷感、賺錢至上嘅黑客,都話想上街遊行。阿虎問佢點解?佢話頂葉劉唔順。
雖然國家安全法通常都係好辣及好專橫,正如滙豐(005)亞太區主席艾爾敦話,其他國家都有類似法例。但因為市民唔信任阿董,所以唔想賦予阿董政府更大權力,香港應該等到有位人人信服的特首出現後,才就23條立法。現時民怨咁深,若勉強迫香港人接受,有乜幸福可言呢?若七一當日,左派人士搞對抗性遊行,釀成衝突,咁就會相當大鑊。
唔知係咪個個都好似黑客咁冇心機,所以大市咁牛皮,恒指收9628,微跌0.36點,成交萎縮至63.50億元。不過,市場始終都係講實際,相信大家都係等緊議息結果。
葉氏化工(408)純利大增72%至1.03億元,末期息派5仙,全年派息共9仙,本來應該係好消息,但股價仍先升後跌,收報1.75元,跌1.68%,成交則大增至1322萬元,好似有人散緊貨咁款。此股PE8.3倍,息率5.14厘,以工業股而言,唔算太吸引,加上期內業績有筆877萬元特殊收益,有獲利回吐亦唔奇。

華智鑊氣十足
華智控股(8065)一如所料,首日掛牌鑊氣十足,收報0.375元,較招股價0.25元高出50%。噚日股價最高見0.38元,最低見0.30元,成交3769萬元。Cookie話,華智成交好難維持日日咁多,有貨就好出啦。另一隻新股華園控股(2349)表現就冇咁威,收報0.87元,較招股價0.85元高出2.35%,成交金額3362萬元。
阿 虎