香港航空噚日一班由香港飛往北京嘅航機，據知因北京實施航空交通管制，搞到機上乘客滯留喺機艙內，有大陸女乘客瞓地抗議，亦有人報警求助。最後航班足足比原定時間遲咗11個鐘先起飛。(新聞連結： http://bit.ly/2tIDSNQ )

據消息指，呢班航機有多位藝人乘搭，當中包括何傲兒、林小明、洪天明、馮素波同成家班嘅藝人。

《蘋果》今日下晝聯絡到何傲兒，佢承認自己正正係搭呢班航班：「我本來飛北京要出席一個活動，但一再延遲都趕唔到，已經立即聯絡主辦單位致歉。我既然趕唔到活動，就諗住同助手落機，我企喺機組人員後面，見到大媽瞓哋嗰幕，佢一直話要回家，其實機組人員好有禮貌，EQ好高，但場面都係混亂。我都有幫手勸個大媽，最後我都係冇坐呢班機離港，落機就攞番行李走。」

至於同樣搭呢班航機嘅徐小明，就話航空公司安排混亂，佢表示：「噚日我同元華、洪天明等返北京做活動，咁我哋一直坐喺商務艙等起飛，但一直飛唔到，我哋喺機入面等完，又出番去等，到上番機等一輪都係飛唔到，咁就一直困喺個機艙好鬼焗，坐喺機尾有啲乘客直頭焗暈咗，幾個內地壯漢同警察講嘢都好激動，我見咁嘈，有幫口勸乘客冷靜，後來佢哋都肯聽，乖乖埋位坐低，好彩最後都飛到，不過都搞到成凌晨5點幾先到北京，真係折騰咗我10幾個鐘，香港航空真係要好好改善下呢個啲問題。」

而馮素波就話自己冇見人瞓地抗議：「我冇行去睇，但曉華(劉雅麗媽媽)有睇到。」而洪天明老婆周家蔚就話：「一直都有同天明保持聯絡，佢都叫我瞓先，仲話驚飛唔到，要返屋企。後來佢留言話凌晨5點幾至到。」家蔚話可能真係好大雨，所以飛唔到，航空公司都唔想，好在天明今日先出席活動，冇影響工作。