梅艷芳出殯前夕（一月十一日），無綫翡翠台播出梅艷芳舞台特輯，老婆要睇，但左丁山睇緊車路士對李斯特城，唔肯轉台，結果一人睇一半，啱啱睇到梅艷芳在新大球場開幕夜與羅文合唱《激光中》，不禁嘆一聲，此曲絕響矣。羅文、梅艷芳，與《激光中》填詞人林振強同在○二、○三年因癌病逝世，以後重去邊度搵到同樣嘅鐵三角組合？即使以後大球場再度允許藝人開演唱會，左丁山都諗唔到本地藝人之中，會有邊個可以鎮得住大球場。
睇完梅艷芳特輯，想話再聽佢啲歌，點知一張阿梅CD都搵唔到，原來佢最紅最巴閉之時，CD尚未認真流行，而且好貴，所以左丁山係買錄音帶，𠵱家聽十八年前嘅錄音帶，效果梗係冇咁好，所以聽聽吓就放棄。

八十年代冒起嘅本地紅歌星真係多，許冠傑在七十年代已經係巨星，羅文、譚詠麟走紅時候，後佢成十年，張學友、劉德華、張國榮、梅艷芳，都係八十年代紅透半邊天嘅。嗰陣係canton-pop嘅黃金時代，搞到全個東南亞、上海、北京、台灣都要學廣東話，香港流行文化可以成為出口商品，左丁山當其時喺東南亞周圍去，都唔覺得幾威水。可惜不進則退，香港人曾幾何時變成阿燦，梅艷芳後無來者，都幾悲也。七八十年代出生嘅香港人，請奮起接棒，發揚香港威風。