ViuTV一眾不同系列節目主持包括鄧洢玲（阿旦）、王貽興、梁奕倫、余迪偉等今日喺旺角朗豪坊公佈節目動向，陳靜（DaDa）拋胸露4吋事業線撐場做嘉賓，並帶同同佢成個餅印咁樣嘅3歲姨甥女現身，DaDa話：「今個新年都湊女，o依家係熟手保母，自己都想快啲生，要有段好姻緣先，我屬蛇，聽講今年姻緣、愛情、工作都好。」

DaDa透露現時未有男友，佢好心急話：「都停咗好耐，冇乜機會識新朋友，見嚟見去都係老朋友多，以前緣份都喺外地，o依家想搵番香港男友，近年自己專注屋企，想男友都可以幫手照顧屋企人。」DaDa近半年搬番屋企同家人住，佢透露並冇個人特別原因，只係純粹同家人互相照顧：「最初都唔慣，獨立咗咁多年，o依家一日三餐好幸福，日日有靚湯飲好溫馨，任何關係都畀唔到呢種感覺我，想儲多啲錢，買大啲屋同屋企人住。」仲講笑話過兩年都冇拖拍就會相睇。

阿旦主持嘅節目《啪啪聲太好聽》會繼續拍多半年，節目成為全台收視最高節目之一，節目會探討性愛為主，佢話：「呢個節目對我拍拖好有幫助，幫到我下半生，將來我嘅另一半會好幸福。」節目即將有一集講述梁奕倫去一樓一㩒鐘仔，阿旦在拍攝過程聽到一班男工作人員議論紛紛，講到好自然，聽到就觸發嬲嬲地。問到阿旦有冇遇過男友召妓，佢話:「出軌偷食就有，之後我會大興問罪之師，幾愛都會斬斷，唔可以忍一世，但女人都要自我檢討，可能性智識唔夠又或自己太差，男友先有機會外求。」