喺泥地賽，有啲練馬師練嘅馬零舍醒，記得以往王登平仲係練馬師嘅時候，佢啲馬跑泥地特別勁，當時平哥有個外號叫Mr Dirt。咁多年後嘅今日，又有邊個練馬師成功接棒？

練馬師徐雨石肯定係近幾季表表者，佢啲馬草地搏極贏唔到，一轉去玩泥地，誇啲講句，得多過唔得。

今季泥地徐雨石已有11Win進帳至勁，而要注意嘅係1200米竟佔咗10Win。跟住就到新開倉嘅羅富全贏8Win，1200米同1800米各執兩場，1650米則4Win。

今晚（28日）徐雨石有五駒出爭1200米路程，「勇冠多」、「藍天堡馬」都贏過同程，但最吸睛必然係尾場「豹子頭」，三歲仔在港三戰全跑泥地未輸過，與同場沈廐「上簽」一樣咁勁。

至於羅富全就靠晒兩匹泥地專家「好腳頭」、「威勢之寶」叫糊。

另一方面，於泥地至醒騎師之中，頭馬遙遙領先嘅雷神同潘頓各8Win，成績好係理所當然；之不過原來巫顯東都8勝就有啲意外，而且21.1%嘅勝出率，仲高過18.6%嘅雷神同18.2%嘅潘頓。

但最奇怪係同樣有磅減嘅潘明輝，季內竟未贏過泥地，落差咁大真唔明點解？

講番雷神同潘頓雖然大家都8Win，不過潘頓1200米佔咗7Win，而雷神就啱啱相反，5Win係贏1650米，希望今晚佢兩位嘅馬可以幫到大家投注獲利。