煲呔忽然相信人多好辦事，鼓勵特區人民摒棄家計會一個嬌兩個妙嘅忠告，叫人生夠三個。可惜特區百物騰貴，要養大一個仔女並非易事，剛剛就有位爸爸，由於太太生完雙胞胎再生三胞胎，搞到斷擔挑而釀成家庭慘劇，提起都令人心酸。
官場之中，原來亦有人一生就三名，馬上達成特首嘅目標（當然佢哋生嘅時候仲未有煲呔指示）。第一個就係工商及科技局常秘何宣威。話說八方早兩日寫過何秘書長帶仔去加拿大升大學、原因係佢驚美國學費貴負擔唔起。八方好奇怪，以常秘職級，月入十幾廿萬，供個仔去外國讀書啫，使唔使呻窮呢？
文章見報後，有知情人士來電笑八方唔知底細。原來何常秘係多仔公，佢當年生咗三胞胎，如果好似李珊珊咁話養大一個仔要四百萬，咁三個仔一齊升大學，機票都要買四套，咁常秘可能都要搵兼職。
另一個多仔公就係剛剛由新聞處退休嘅副處長麥國華。呢位記者之友，第一胎生咗個仔；到麥太第二次懷孕，係三胞胎，一加三合共四名。
八方問麥Sir當年餵奶換尿片辛唔辛苦？佢話𠵱家啲細路大晒，都唔記得以前嘅辛苦。麥Sir啲仔比何常秘嘅大，佢個大仔已經做緊嘢。三胞胎中，其中一個今年中大畢業，搵到嘢做㖭；另一個喺英國讀緊碩士，第三個就身在美國，讀緊大學。三個小朋友都學業有成，實在戥麥Sir開心。

麥國華鍾意做義工

講開新聞處，八方班老友好多都退下火線，有啲就食瘦雞餐走人，有啲就好似麥國華咁，做咗38年，係時候做吓自己喜歡嘅事。新聞處有班退休新聞官組咗個行山團，逢星期一出動，差唔多全港嘅山頭都行過；麥Sir就冇參加，佢反而鍾意做吓義工，得閒四圍去。
問佢同邊個機構做？佢話就係專為山區教育而忙碌嘅「苗圃行動」。呢個組織已經有十幾年歷史，麥Sir好謙，話「我只係幫頭幫尾」。