臨近年末，第四波疫情仍未見好轉，政府今日宣佈加辣防疫措施，包括本周四（10日）起禁止食肆晚上6時後提供堂食，又賦權食衞局長可發出限制檢測公告，強制某處所內人士須有檢測結果後才可離開。

有食肆負責人預期實施後將僅餘兩成生意，批評政府不願全面封關，每次收緊防疫均是「頭痛醫頭腳痛醫腳」；亦有市民擔心「跪街食飯」慘況會重現街頭，嘆「政府做得唔好，但委屈我哋市民」。

泰國船麵店「船皇」負責人Andy指，預期堂食被禁後，餐廳生意會僅剩約兩成，而因麵食類外賣生意一向較差，故即使推出外賣優惠、組織外賣車隊等，成效亦不如理想，坦言目前情況已是「蝕住做」。

他續指，原預期聖誕可追回部份生意額，故對年底禁堂食感到失望，但強調餐廳不會裁員。Andy又稱，不會覺得食肆相比其他行業較受針對，但批評政府每次防疫政策都是治標不治本，寧願「一個月全部禁（足）、全面封關，唔好封啲唔封啲，好過而家突然之間又嚟，損失係會更加大」。

從事飲食業的市民鍾先生指，第四波疫情初起，其餐廳生意已開始變差，一晚僅有10多個客人，故認為禁堂食對餐廳影響不太大，「因為都係靜」，但仍擔心會雪上加霜。他又認為，食肆在防疫下被針對是無可厚非，但批評政府沒有全面考慮所有因素，「淨係對呢度（食肆）做，做幾多次都冇用，個窿都穿嘅！」認為政府應做好關口檢疫及封關。

就政府今日才宣佈授權封區，鍾形容是亡羊補牢，「一開始爆發肯做就唔會有咁大影響」。

從事展覽行業市民黃小姐指，職業關係較少出外，故禁堂食對她影響不大，但預期「踎街食飯」的慘況會再次出現，「唔係個個有屋企住、有屋企飯食」，有相關部門執法標準不清晰，「喺街食又唔知會唔會俾人話犯法」。

她引述早前有大學研究指，目前流行病毒株從尼泊爾輸入，認為已證明是政府封關不力致疫情爆發，批評其拒絕嚴謹把關，「次次都係等爆到停唔到，先走嚟搵商家食肆埋單，其實佢哋好慘」，嘆食肆如負上不應負的責任。

大學生謝同學指，禁堂食對她影響不大，但預期聖誕大部份節目會取消。她又擔心禁堂食下會有大批食肆倒閉，希望政府向他們提供額補貼，又認為街上會再出現在被迫街邊吃飯的市民，嘆「因為政府做得唔好，但啲人逼住要去接受，係委屈咗我哋市民」。

她又指，政府今日才宣佈授權封區是太遲。但亦形容「做好過唔做」。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！