國家領導人級嘅鍵盤戰士、全國政協副主席梁振英，今日走出網絡世界，出席有關大灣區同創科嘅活動，唔單止負責頒獎，仲喺台上演講添。不過佢又同特首林鄭月娥緣慳一面，因為佢哋係前後腳到場。至於佢篇演辭，就同佢喺網上講嘢一樣，都係咁惹火。

講到大灣區發展同創科，梁振英仲唔上晒身咁款一面唱好咩？佢先嚟就表示喺人才方面，一定要做到「學有所成」同埋「學以致用」。呢個講法好熟口面？係呀，八方聽過怕且唔少於689次㗎喇。

佢又係想話香港做到畀學生學有所成，但係學以致用仲差啲。譬如佢做過城大校董會主席，而城大有好好嘅工程學院，但試過有學生喺大二、大三時成日去健身室，原來係擔心畢業後搵唔到工，打算去考消防。此外，佢亦覺得科大航天工程畢業生要去做飛機維修係浪費人才，搞到學生「英雄無用武之地」。所以佢覺得要改變現狀。

乜講到做城大校董會主席咁遠呀？梁振英做過特首喎，香港搞成咁佢冇份咩？梗係有份啦，佢隨即標榜自己有份促成同深圳共同發展河套區，仲要翻嗰畢已經翻到爛嘅舊帳，話大家要記住係反對派議員、泛民議員拉布拉死咗兩次成立創科局。最後嘅結論，當然係創科人才要把握、掌握好大灣區嘅機遇。真係無乜創意，連新意都冇。

到佢要走嘅時候，記者就問佢眾籌告人件事，佢毫不意外地當記者透明，直行直過。