楊怡、張慧儀同莊思敏今日以代言人身份，喺尖沙嘴為李霖恩太太有份投資嘅醫學美容中心擔任開幕嘉賓，同場仲有張達倫、莊思明同杜大偉等。楊怡噚晚喺社交平台貼咗憤怒鳥嘅圖片，指有傳媒闖入佢屋企門口偷影，佢今日講番嘅時候：「我係有啲震驚同嬲，係有啲侵犯咗私隱，我認得佢亦都影低咗，希望下次唔好再係咁啦。」

問到佢屋企最近有咩咁吸引傳媒追蹤拍攝？楊怡笑言：「雖然我哋係藝人，但喺屋企都好free，係有着衫嘅，不過都好隨意，有着衫唔代表係着晚裝㗎嘛，都係造成好大困擾。」佢仲話老公羅仲謙忙住開工唔得閒理，淨係叫佢息怒。講返今次為醫學美容中心代言，楊怡話好開心，仲高呼：「我要收緊呀！要由頭做到腳，仲想帶埋媽咪同老公嚟。我老公成日話要保持青春，貪靚呢樣嘢，千祈唔好睇小我身邊嗰個。」佢仲笑言做咗療程，下次被偷影嘅時候都可以保持V面。

張慧儀表示早前同李霖恩合作，所以今日要親身嚟支持：「最近都忙喺國內工作，拍廣告同一啲剪綵嘅活動，九月尾就會畀自己休息一下，因為囝囝10月就會做手術，希望畀多啲時間陪住佢。」佢坦言囝囝要接受手術有啲心痛，自己近日都可以因為壓力而變得忟憎：「囝囝係happy child，佢上次入院檢查都係麻醉咗，佢仲同我講瞓醒就做完，反而問返我心情。」張慧儀又話最近加入咗兒童心臟基金會，成為正式執行委員：「因為個仔，基金會幫咗我好多，自己亦都想回饋返社會，嚟緊都會幫手推廣下。」

至於張達倫帶埋太太同11個月大嘅囝囝碩碩現身，佢笑指囝囝個樣好老積：「好似10幾歲咁，佢唔驚鏡頭o架，頭先舞獅都唔驚。」問到囝囝開始講嘢未？張達倫話佢有疑似叫daddy，不過最鍾意係講「掟掟」：「好似講粗口咁，哈。」佢表示唔介意同囝囝齊齊拍廣告，自己亦都回復自由身，早前上大陸傾合作，都想返去拍劇賺人仔。

精選娛聞，喺晒《娛果》
http://fb.com/appledailyent