當鄭嘉穎叫大家「call我吖」，打電話去只係買到炸雞，啱啱由公牛加盟木狼嘅球星占美畢拿（Jimmy Butler）同樣叫大家「call我吖」，真係接得通畢拿本人架！公牛早前同木狼作出交易，將畢拿同第16順位新秀柏頓（Justin Patton）送去明尼蘇達，換取「入樽王」拿維（Zach LaVine）、鄧恩（Kris Dunn）同第7順位新秀馬克根尼（Lauri Markkanen），外界普遍都視公牛為蝕本一方，但正所謂「Haters Gonna Hate」，畢拿喺加盟木狼記招上公然向嗰啲視佢為公牛負累嘅haters挑機：「成件事唔算困惑，因為已經預咗，有人需要承受批評，就等我嚟啦。我ok架，每個人都可以有意見，所以按照上述所講，我嘅電話就喺口袋，任何人有嘢想同我講，隨便打773-899-6071。」

聽落好似亂up當秘笈，但的確有好多人真心嘗試打去，結果大部份人飛咗去留言信箱，但畢拿本人喺社交網站上載片段，就見到佢疑似真係同球迷面對面交流！「（球迷：你幾好嗎？）我很好，我而家同好朋友一齊，佢係一個好人…我有近千個FaceTime要聽，但好感激你打畀我，下次再講！」球迷們有興趣嘅話，不妨試吓親身打去？