一齣《盜海豪情》（Ocean's Eleven），曾掀起影圈一陣「盜竊熱」，電影系列開足3集。嚟到第4集《盜海豪情：8美千嬌》（Ocean' s 8），主角統統換成全女班，由珊迪娜布洛（Sandra Bullock）、姬蒂白蘭芝（Cate Blanchett）率領莎拉寶森（Sarah Paulson）同艾桂菲娜（Awkwafina）等，展開偷取安妮夏菲維（Anne Hathaway）過億鑽石鏈嘅故事。日前佢哋於紐約接受本報專訪，珊迪娜大爆自己美容秘技，竟然與陰莖扯上關係！

八個女人八把口，曾有報道指幾位阿姐於片場不和吵大鑊，不過 53歲嘅珊迪娜立即否認：「我哋十分支持大家，希望每一個人都拍得好同開心，可能我年紀越大，朋友嘅圈子越來越細，我哋都好信任大家，係一種好特別嘅友誼。」今次佢飾演佐治古尼（George Clooney）妹妹，更自爆有向佐治取經。

今次電影要同眾拍檔爭妍鬥麗，珊迪娜早前就被名嘴艾倫狄格勒絲（Ellen DeGeneres）指佢愛上「陰莖美容法」，珊迪娜笑稱只係講下笑：「我愛嘅係表皮生長因子美容液，由幹細胞繁殖製造而成，只係艾倫講笑，演變成陰莖美容術！我都鍾意針刺療法，好痛但好有效！」

今次姬蒂嘅角色有型強悍，可謂同真人一樣，原來最近佢推咗部戲，原因係片酬比男演員低：「咁係好普通嘅事，爭取男女平等待遇係唔容易嘅事，慢慢嚟啦，我都試過好多次只收到一萬美金嘅片酬，我索性退返俾佢，如果其他演員可以咁樣做就好喇。」

安妮今次做返自己，演一位女星，角色更同現實一樣，會出席有時裝奧斯卡之稱嘅Met Gala，原來經驗豐富嘅佢都曾經失手：「每一次都有好美好嘅回憶，但最難忘嘅係有一次爆拉鏈，我覺得很徬徨，好彩搵到位裁縫幫我搶救！」

記者Lilly Lui紐約傳真（Hollywood Foreign Press Association）