【最強見習騎師】火車首次駛入港島 以凌厲後勁直衝終點!
賀賢潘明輝盈華盛甲火車潘
今晚(14日)谷草冇大賽撐場,叫做華人騎師之夜最啱,事關繼23歲巫顯東起孖及43歲賴維銘開齋後,另一23歲見習騎師,外號「火車潘」的潘明輝亦唔執輸有馬贏。
潘明輝於第五場四班1200米,策騎師傅賀賢的「盈華盛甲」,後上爆出27倍冷Win,個人首戰谷草即有馬贏,連帶年僅三歲初跑快活谷的「盈華盛甲」亦告開齋。組合獨贏A3則派33元。
潘明輝今季在港出道,一直只可跑沙田,賀賢早已向馬會申請安排徒弟潘明輝出師谷草,直至上周六谷閘後,馬會才予以批准。這晚火車駛入快活谷作賽,但潘明輝上半場表現一般,只憑頭場「開心健康」上名跑第三。
不過,跑到第五場潘明輝終於嚟料,初策三歲馬「盈華盛甲」出賽,人馬齊齊首戰谷草,早段留住跑守第八位,直路從大外欄越衝越勁,臨門及時超越一眾對手先過終點,爆冷得手。截止目前為止,潘明輝在港共參與過9個賽日,例有馬贏未斷纜,在港增至13場頭馬,距離升格改減七磅尚差七場。
「盈華盛甲」馬主陳慕婷丈夫陳正欣表示,沒有想到此駒跑到第四仗便可交出頭馬,是個驚喜。由於今晚是潘明輝在快活谷第一次上陣,所以都有少少擔心,結果小潘發揮出色,令人十分滿意。
今場「你知我意」及「澤心星」兩匹前置馬順序得二、三名。第四名為祈普敦全晚唯一座騎「金碧旺旺」,四重彩派八萬九千幾。