曾志偉噚日聖誕節喺北海道發生車禍，跟警務處刑事及保安處處長李志恒嘅七人車迎頭相撞，據知，與志偉同行還有一名年約40歲姓李女子，兩人都冇受傷，但負責駕駛嘅志偉，循例要接受酒精測試。發生意外地點喺余市附近，余市有日本威士忌故鄉之稱，市內有一間酒廠好出名，好多遊客都慕名而去。

眾所周知，過往志偉逢喜慶日子都會飲番兩杯，而且幾乎逢飲必醉，以前就發生過多次「打直入，打橫出」事件，如12年譚詠麟嘅媽咪擺壽宴，志偉醉到不省人事，慘被阿倫同陳百祥用壽包整蠱，最後更被連人帶櫈抬離場。而13年志偉為慶祝踏入60歲，跟同月生日嘅黃杏秀、彭健新齊齊開派對狂歡，壽星公志偉high到企上櫈唱歌，最後同樣醉到瞓低，被人將花、酒樽等擺喺身上作弄，連腳趾公都攝住個酒塞。

不過，3年前志偉因腳部痛風發作，自此減少飲酒，就算老友阿倫65歲大壽、好友袁潔瑩50歲生日，甚至去年志偉再奪台灣金像獎最佳男配角，志偉都為咗身體着想忍口，滴酒不沾清醒離場。

精選娛聞，喺晒《娛果》
http://fb.com/appledailyent