蟹季到,唔少老友開始約八方食蟹,八方怕煩兼懶拆蟹,所以去蟹宴都係淺嚐一、兩隻,不過與一班朋友邊飲花雕邊擦蟹,確係樂事。
內地近年大閘蟹供應多,大腕食蟹亦十分瘋狂,有個做會計師嘅老友同八方講,去年蟹季去上海公幹,有個大老闆請食大閘蟹,一圍枱八個人,竟然預備咗幾十隻蟹,一大盤端出來,隻隻至少六兩重,老友形容係「蟹山」,場面堪稱壯觀。大老闆係主場請食蟹,質素唔使置疑,而強國大老闆食蟹,只食膏唔食肉,霸氣。
雖然只係食膏,不過幾十隻蟹始終吃不消,食剩十隻八隻,大家都夠皮,呢個時候,大老闆叫人送上一煲藥材雞湯,仲親手將食唔晒嘅蟹放入煲內,呢煲大閘蟹雞湯嘅滋味,老友話飲得落嘅,仲話原來雞同蟹一齊煲,味道幾夾,而講到識飲識食咁博大精深嘅文化,港燦識條鐵咩!