韓國音樂盛事《第33屆金唱片頒獎禮》將於下月5號、6號舉行，大會今日公佈入圍名單，當中人氣男團防彈少年團(BTS)憑專輯《Love Yourself 結’Answer’》及歌曲《Fake Love》分別入圍「唱片部門」及「音源部門」嘅「本賞」，至於「國民妹妹」IU就憑歌曲《BBIBBI》入圍「音源部門」嘅「本賞」，由於入圍「本賞」亦等同於入圍最高殊榮嘅大獎，所以IU及BTS將繼去年後，再度爭奪大獎殊榮。

另外，IU今早從韓國出發襲港，率先到銅鑼灣出席記者會，然後聽晚喺亞博館開騷。因為韓國天氣寒冷，IU着住白色羽絨及戴住白色帽，包到冚現身首爾仁川機場，令身形嬌小嘅IU顯得更可愛。而女團少女時代成員允兒亦於今晨抵達機場，準備到澳門參加澳門國際電影節，但允兒僅穿上長褸、牛仔褲出發，與IU形成好大對比，粉絲都擔心允兒會冷親。

精選韓流，喺晒《娛果》
http://fb.com/appledailyent