NBA選秀會周四圓滿結束，一眾新秀周五亦陸續喺所屬球隊亮相，其中新鮮出爐湖人「榜眼」朗素波爾（Lonzo Ball）一日走兩場，出席湖人記招同舉衫儀式當然唔少得，之後仲踩過界去到美國職棒大聯盟（MLB）為洛杉磯道奇主持開球禮，結果道奇以6:1大勝科羅拉多洛磯山，幾好腳頭喎。

講番湖人記招，籃球事務總裁魔術手莊遜（Magic Johnson）早前送走D羅素（D'Angelo Russell）去網隊，騰空正選控衛一職畀「波仔」，呢日佢就毫不留情解釋呢個決定：「D羅素係好出色嘅球員，絕對有天賦成為明星球員，我哋好感謝佢為球隊嘅付出。不過，我需要一位領袖，一位令隊友變得更好、渴望一齊打波嘅球員。」嗰邊廂佢就對「波仔」讚不絕，話自己親自去到高中問過校長、老師同學生，得知波仔為人相當受歡迎：「佢係一個領袖，以正確態度待人接物。我就話，OK，我哋搵到需要嘅人啦。」凡事留一線，日後好相見，即管睇吓魔術手眼光係咪咁準？