因參加《全美一叮》（America’s got talent）而一鳴驚人嘅Celine（譚芷昀）近日備受注目，而佢同全力培訓佢嘅幕後人——Celine爸爸譚順生，即時成為全城焦點。

不過，有消息指譚順生曾經喺薛家燕間「家燕媽媽藝術中心」做導師，不過後來懷疑佢撬走藝術中心啲學生，又收高昂學費，令學生家長向家燕姐投訴，令家燕姐覺得譚順生有問題，所以冇再合作（新聞連結： http://bit.ly/2tImAk8 ）。

而時裝設計兼形象指導張學潤（Nelson）都喺家燕媽媽學校做導師，問到知唔知呢件事？NelNel喺電話表示：「我教小朋友嘅儀態同catwalk班，不過冇撞過譚爸爸同Celine妹妹，第一次見係喺佢哋嘅唱片簽約儀式上，當時我做司儀，但從來冇合作過。」

NelNel就力撐家燕媽媽：「家燕姐好好人，佢好提攜後輩，佢係好均真好清楚嘅人，就算我未上完堂，佢都追我攞票收錢，所以同佢做嘢好放心。既然家燕姐公開講呢件事，我覺得事出必有因，不過無論點都好，大人嘅事唔好影響小朋友，因為小朋友係無辜，大家唔可以抹煞Celine妹妹係好有天份。」對於譚爸爸教唱歌收一萬蚊四堂，NelNel話：「覺得值得嘅人就捨得畀，唔值得就一蚊都唔畀，呢啲願打願捱。」