談泉慶係1975年無綫第4期藝員訓練班出身，同佢同期嘅同學仔，其實有好多猛人。最多人識嘅一定係杜琪峯，當年杜Sir畢業後轉去做幕後，由製作助理一路做到監製，參與過嘅作品有《射鵰英雄傳》同《鹿鼎記》等經典作，後來杜Sir轉去拍電影，出品嘅多作更加多，包括《鎗火》、《暗戰》、《孤男寡女》、《瘦身男女》等，名氣更衝出香港，紅到國際影展界別。

同屆另一名人潘嘉德，係無綫監製潘嘉德，由佢監製過嘅作品，唔止受歡迎，好似《卡拉屋企》、《廟街·媽·兄弟》、《男人之苦》等，當中《刑事偵緝檔案》同《鑑證實錄》更拍成系列，至於較近年嘅，就有《On Call 36小時》系列，同《巴不得媽媽…》等。

另外，黃建勳、劉仕裕同賴水清，佢哋3個都係向幕後發展，其中拍過《茶是故鄉濃》同《巾幗梟雄》等嘅黃建勳，喺離開無綫後，同樣轉攻電影界，擔任編導，同時佢仲係香港浸會大學電影學院嘅客席講師。至於賴水清先後効力過無綫、麗的同亞視，喺1980年代已經北上發展，後來轉過台灣，1997年憑台視嘅《新龍門客棧》奪得第32屆金鐘獎電視金鐘獎最佳導演獎（與朱莉莉同獲頒此獎）。劉仕裕同樣北上發展，佢喺無綫年代參與過嘅作品包括：《情濃大地》、《西遊記》同《封神榜》等。

其實談泉慶班同學仔，都唔係全部做幕後嘅，當中以李國麟最標青，佢喺無綫効力30幾年，儘管唔係擔正做男主角，但佢演嘅角色都好搶，扮奸又奸到出汁，演喜劇嗰啲又難唔到佢，古裝又得，時裝又得，參演劇集嘅數目逾160套；另加佢參演逾20套電影，以及喺海外拍嘅電視劇，演出經驗極豐富。

另外，班上嘅梁碧玲，喺經典劇《香港81》系列中飾演相士覺悟因嘅秘書蘇小姐蘇麗珍，而佢亦參演過《家變》同《京華春夢》等劇集，佢已移居外地，冇喺娛樂圈發展。同班嘅黃杏秀，眾所周知，佢係陳百祥太太，至今已30幾年，黃杏秀當紅時擅長演俠女，同期花旦有鄭裕玲同趙雅芝，後來佢疊埋心水做陳太。