張栢芝前晚到銅鑼灣時代廣場看《千機變》首映,十時左右她駕駛其黃色MiniCooper與女助手離開,其中一輛尾隨的採訪車追至耀華街出口時,撞向其車尾,栢芝的女助手隨即代為報警。
栢芝向採訪車司機說:「都叫唔好跟咁貼啦。」但當她得知採訪車是屬於英皇娛樂老闆楊受成旗下的報章時,即笑着說:「咁我唔追究。」其後栢芝向記者說:「《千》片係大製作,所以我嚟睇吓,我知有人放料畀記者,已經提早走人,唔明點解睇場戲搞到咁大件事。
車尾被撞凹
「跟車跟咁貼你哋自己蝕底,我唔追究啫,唔代表其他藝人唔追究,今次好彩冇事,如果我有事邊個負責。」
警員到場後,將兩車分開,栢芝的MiniCooper揼巴應聲落地,車尾被撞凹,栢芝說:「哇,好傷!𠵱家咁溶,一定要報館賠維修費,我自己冇乜錢,呢架車新車落地都未夠一個月。」與此同時警員發現栢芝沒帶駕駛執照亦沒有身份證,其後要經理人李小姐代拿到現場,警員和交通警登記資料後,便讓栢芝離開。
行使酌情權
有記者質疑沒有駕駛執照駕駛實屬違法,警員更沒有要求栢芝吹波,昨日警察公共關係科發言人對此回覆本報說:「吹波原則係有交通意外發生時,警員懷疑有人酒後駕駛就會做,通常有人受傷,就一定會吹波。揸車冇駕駛執照係犯法,但可以有酌情權,當時警員已經畀咗口頭警告,而且佢(指栢芝)喺好短時間之內就出示番身份證明同駕駛執照。」
此外,栢芝昨日在九龍塘拍攝新片《忘不了》時向記者說:「交通意外之後我同助手去咗睇醫生,佢手腳腫晒,條頸又有事,我自己就大髀瘀晒。」 採訪:魯萍、陳梅香、楊潔雯
攝影:林德雄、陳偉權