當股災遇上業績期，Samantha慶幸忙到反艇，連入市機會都冇，減少咗無謂傷亡，如果唔係，一下股災一下QE隨時摑到頭昏腦脹。各國陸續封關，陷入緊急狀態，人心絕望到資產全線下跌，世上只有現金，不，係只有美金這個樂土，聯繫匯率下揸住港紙未感受到痛，如果閣下揸英鎊無疑是切膚之痛，眼見各財金官員推算失業率錄雙位數升幅，而GDP錄雙位數跌幅，藥石亂投能否止住跌勢？Sorry，話事唔係央行，問吓隻病毒罷喇！

美金衝上102，新興市場勢危，封閉市場如A股也開始追跌，近期很多從未落場朋友，心癢癢想低撈，距離底部有多遠真係無人知，上一次疾病全球大流行時，資本市場尚未成熟，大家戰戰兢兢，深怕一個壞消息就火燒連環船，港股和美股就以千點方式下墜。要撈底的投資者要問自己第一個問題，唔係有乜股可以撈，而是口袋有多少彈藥可撈，防守股煤氣（003）就上演兩日兩成的慘劇，炒股錢可以輸，信心是不可以崩，下注時請謹記有多大信心可捱到最後。

對炒友而言，唔係打開個報價機搵股買，而係打開份業績報表揾股研，當市場尋出一個底，機會就是留返畀有準備的人。現時好多人停薪留職，衣食住行樣樣都要慳，惟獨電話費唔慳得，無數據點樣24小時監察住網上幾時有口罩賣？又點應付隨時on call的工作時間表？再望望那幾隻香港電訊營運商，表現確係慘不忍睹，誠如我所說，Samantha沒叫大家而家買，5月12日前都是買入香港電訊（6823）的契機，末期息40.37仙就能夠袋袋平安，值得納入購物名單。

2019年市場觀望5G手機面世，延長手機更換周期，香港電訊上月仍交出一份不錯的成績單，EBITDA 為128.17億元，按年增長2%；純利52.17億元，按年升8.1%；年度經調整資金流增加3%至53.29億元。ARPU增加1%至港幣 200 元。總客戶人數為 467.9萬名，增加8%。香港電訊率先飲頭啖湯，有意成為首家推出5G服務的運營商。該股由高位下跌超過2成，歷史股息率逾7厘，用末期息0.4元計算，現價已坐擁4厘息，樂觀點大市1個月後見底，4厘息回報就袋袋平安，值得考慮。

Samantha
https://www.facebook.com/stocksamantha/

----------------------------
【武漢肺炎】專頁
全民自救 抗疫資訊盡在《蘋果》
-----------------------
屬於香港人的移民攻略
立即登入【全球樓行】
Dream House零距離