納指1個月內第二次「走火警」，龍頭股蘋果、fb、亞馬遜隻隻倒水，皆因現金流強、負債低等利好因素吹到一街都知，形成擁擠交易，信念較弱的投資者，一被大行唱淡便嚇到沽貨，繼而觸發人踩人。

本港科技股除騰訊（700）萬劍歸宗外，其餘近期都洗了一次牌，意志不夠的都震走了，短線再回都較易找到支持。如何選股？上週五已畀哂貼士，可以睇番。

今日講隻高息內需股──中國利郎（1234），現價近8厘息，近日價量齊升，砌上格局明顯！利郎定位中高端男裝，今年貫徹「提質不提價」的戰略，提升產品競爭力，食正三四線城市的消費升級概念。上週公佈2017年「LILANZ」品牌冬季訂貨會數據，訂單額錄得低雙位數升幅，增速為2016年春夏季以來最高，除反映業務策略奏效外，也顯示零售市道好轉，令經銷商信心增強，敢落大單訂貨，下半年收入及盈利增長可睇高一線。

去年業績較遜，主要受終止子品牌「L2」業務影響，但管理層慷慨，派息比率升至80%，賺十蚊派八蚊息；今年不再受此影響，配合銷售回勇，業績料如火鳳凰重生，彭博綜合券商分析，現價預測市盈率10.2倍，股息率8厘，吸引力十粒星！

魏力
www.facebook.com/2012jason