「彭國柱變不驚，娶空姐有方健司儀見證」，係喇係喇，2013年可謂喜事重重，本月14日無綫新聞部一口嫁兩個仔，伍家謙同彭國柱一齊「做老襯」，彭國柱迎娶空姐為妻，仲邀請前主播方健儀做司儀。有指「柱仔」為咗呢頭婚事，實行地獄式減肥，足足瘦咗18磅，連訂造嘅褲都唔啱著。而當日無綫新聞部嘅行家亦要一日走兩場、送兩份人情，「好肉赤」就當然0架喇，但係，仲要再俾多次人情，但主角係邊個？大家估吓係邊個？

方健儀噚晚就於微博露口風:「十二月，司儀月之五：賀彭國柱新婚之喜。十二月很多好日，我在聖誕夜還會為另一位記者好友任司儀，猜猜他/她是誰...」可惜方健儀只係開咗個頭，冇講到答案，但就有唔少醒目網民估計下一個結婚嘅係談美琪BB呀。

不過31歲、曾任無綫主播嘅談美琪，2011年7月重返商業電台任首席記者，而最近佢最為人津津樂道嘅事，就係早前俾網民搵番一條、佢07年報新聞嘅錄音帶。當時談美琪讀到「事主嘅媳婦開門查看嘅時候，目睹匪徒乘搭直升機逃走。」原來係將「升降機」錯讀成「直升機」。

事件「出土」之後，談美琪即公開道歉，於fb回應道:「我是談美琪，再向各位道個歉，真的對不起，希望大家見諒。正確是升降機，我讀錯了為直升機。這是07年的一節新聞簡報，當時即時出了一則更正；請代我向你們whatsapp的朋友說聲對不起，我以後會更加小心。」

不少網民大讚「美琪BB」有勇氣肯認錯，表現出大將之風，更有網民話:「欣賞你勇敢面對!!!加油!」都有人打趣謂:「Tam你好靚，我原諒你的過錯」。

究竟方健儀口中嘅「我在聖誕夜還會為另一位記者好友任司儀，猜猜他/她是誰...」係咪談美琪呢？其實佢今年十月已經洩露玄機、貼咗張擬結婚通知書，宣佈同某傳媒首席記者李先生結婚，婚禮定於今年聖誕。有指呢位「李先生」，就係nowTV首席記者李國豪喇。

恭喜晒恭喜晒！