李克勤、陳秋霞、楊千嬅和Twins等歌手昨日到紅館為今晚舉行的《星光熠熠耀保良》拜神及綵排，盧淑儀日前被發現腹大便便，所以快將做爸爸的克勤自然成為焦點，他沒有正面承認愛妻盧淑儀懷孕的事實，而且提起快做爸爸時，他亦保持一貫避忌作風。

克勤說：「首先我好多謝送個封面畀我，知我打緊歌就醒我，今時今日一個麻甩佬藝人做封面唔係易事，之不過我都係掹車邊啫。我都講咗100次，預產期係7月……我隻碟，詳情大家都係問阿倫（譚詠麟）啦。」
至於被周刊拍到買巨鑽𠱁老婆，克勤澄清說：「係佢幫我買耳環啫，只係千幾蚊，但係周刊就誇大咗一千倍個數目。至於話睇中醫，其實係我五年前感冒時睇過一次，我唔想大家一有大肚、安胎就會聯想起，對個中醫亦唔公平，總之佢（指盧淑儀）𠵱家冇嘢，多謝大家關心，佢剪短頭髮都係方便做運動同聽我新碟。」

此外，日前有報道指鄭秀文（Sammi）為了避千嬅而與前經理人李進簽約，千嬅對此說：「點會，我唔相信，前途唔會俾人影響到，如果咁計我就要自己開公司，間間公司都會有artists，我同佢嘅新聞傳咗10幾年，唔會唔開心。」
採訪：駱華齡
攝影：陳慧安