日本天后濱崎步近年明顯失勢，就連avex事務所社長松浦勝人都轉呔投資喺澤尻英龍華身上。

富士日劇《FirstClass2》今晚播出大結局，雖然大家都讚澤尻演技贏晒，可惜開播以來收視欠佳，呢套劇就一改以往日本拍攝作風，噚日仲喺東京趕拍今晚播出嘅最後一集，除咗友坂理惠、倉科加奈等女星之外，劇組又安排大批臨時演員參與演出。

《FirstClass2》埋尾期間，澤尻前日就抽空帶同愛犬出席品牌派對，avex社長松浦勝人都有同場，松浦愛鍚澤尻簡直出晒面，佢喺instagram上載合照時，就話《FirstClass2》收視仆直絕對唔係演員責任，而係富士電視台嘅問題，仲講明會安排澤尻幫其他台如TBS或者NTV接劇，為愛將鬧爆富士電視台。

當日其實Angelababy都有同場，松浦不嬲睇得起baby，當年更簽佢進軍日本市場，今次再見面自然有講唔完嘅話題，松浦就讚baby超級可愛，形容佢係個好女人。