【合和私有化】報警男:拆骨賣產每股值100蚊 胡應湘粉絲:要面對現實
合和
雖然合和私有化提案獲基金股東接受,但場內數百位小股東卻意見不一;記者在會場外訪問5位小股東,其中有4人贊成私有化,1人反對。
今早有一名中年男士在股東登記處大聲疾呼私有化作價不合理,及至法庭會議直斥,「咁樣叫為股東利益好咩!點解唔將公司清盤賣晒佢(資產)?啲資產可能值100蚊喎!」、「啲凶宅都賣到7折啦!點解我哋啲咁優質嘅解資產要6折賣畀主席呢?」要求公司法律顧問代小股東出頭。
雖然他一番話在現場獲得不少掌聲,但台上的法律顧問姚鈺華律師釐清今次私有化符合法定程序。該男子繼而報警,其後在股東會開始前由兩名警員陪同下離開。有場內其他股東稱,該男子為「碎股黨」,經常出現在不同股東會。
股東袁小姐認為私有化多數都係衰人,「賺咗錢就揼低你啲股東,你認購咪推筆錢畀佢,佢賺咗錢咪畀番多少畀股東,拎番筆錢算數。」
當初購入合和是相信胡應湘老實、背景幾好,到今次股東會「佢乜嘢都唔答,以前唔係咁,變晒啦,而家啲人見到錢就變晒……你反映吓,個衰人,我而家叫佢衰人。」
股東會上不乏忠心Fans出力為胡應湘拉票,將發問時間變成宣傳易。有位熟書嘅年長股東,由出售合和公路減少公司經常性收入及派息開始,逐個細數合和目前持有的項目需要大量資金及時間發展,料短期內派息有限,以致機構投資者對合和興趣缺乏,強調一旦私有化提案拉倒,股價將打回原形至23元至24元,呼籲「各位股東要面對現實」。
其他粉絲亦齊聲拍掌表態,而胡應湘對於出言力撐的股東展現笑容,「多謝呢位股東,但問題與會議題無關」,語畢滿堂哄笑。
婆婆股東Winnie數年前購入兩手合和「我初頭買合和公路,我就嚟開股東會,佢就有好多嘢(食),多到我食唔晒。嗰時你坐喺度佢畀碟嘢你食,食完仲拎兩盒點心,收尾我就買合和。」
雖然投了贊成票,她認為胡應湘在股東會上的表現麻麻,「頭先佢就有啲嘢唔啱,啲人問嘅問題,佢成日都話,無關議程,無關議程,一條問題都冇答。有啲人問嘅嘢幾合理嘛,又唔答人。」
何太稱:「如果合和私有化唔成,個市就跌到死,我呢隻股票。(點解會買合和?)因為我睇中灣仔啲樓。」
周先生指:「支持(私有化),因為套現後可買其他股票。(持有多久?)很久了,因為老闆做得好……胡應湘做得非常好,不過欠缺點運氣。」
張先生表示:「我支持的,很久都未見過這價錢。(持有多久?)不是太久。(如果私有化未能通過?)未能通過就收息,長期持有,當初都是因為息口不錯而買入的。」
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef