唔知係政府總部風水有問題，定真係官不聊生，特首煲呔手下一眾問責官員近日身體認真麻麻，之前有財爺鬍鬚曾要通波仔、教育局局長孫公做小腸氣手術，近日商務及經濟發展局局長劉吳惠蘭驗出早期腸癌，好彩做完手術冇乜事。噚日政圈突然流傳，煲呔前日現身瑪麗醫院睇心臟科，之後傳傳吓，仲傳佢噚日入埋瑪麗醫院，結果引來一陣不大不少恐慌，政府急急澄清煲呔身體非常咁健康，絕對係老虎都打得死幾隻！

出動心臟科大國手

話說前日有人見到煲呔去瑪麗醫院，而佢搵嘅醫生，正係當日幫鬍鬚曾通波仔嘅心臟科大國手李偉聯。係人都知心臟毛病同腳痛一樣冇樣睇，一係就冇事，亦都可以係大件事，由於煲呔去醫院實在太神秘，噚日下晝更一度有傳佢要入院！搞到呢個地埗，見慣大場面嘅中環人都話驚，唔通上次老董腳痛、今次到煲呔心痛？況且佢早前聲稱被撞瘀心口，莫非內傷復發咁驚嚇？
八方聽聞煲呔入醫院呢單嘢，連醫管局班高層都驚動埋，而特首辦為了以正視聽，發言人嚴正表示，特首星期三係去做例行全身檢查，身體情況相當健康。不過八方唔明，為乜全身檢查要去睇心臟科大國手？知情人士話，原來李偉聯同煲呔識於微時，兩個人係好朋友，所以煲呔定期bodycheck都搵佢，只係佢同時係心臟科名醫，若因此聯想到煲呔心臟有毛病，呢個絕對係不必要嘅猜測云云。

老董腳痛事件重演？

另一名政府消息人士就咁講，如果唔使應酬，煲呔傍晚收工後會喺禮賓府做運動，絕對係行得走得、食得瞓得，而且佢做完身體檢查後，已經放假離港旅行去也！不過話又得說回來，當日老董一樣係行得走得，但係民怨沸騰，何嘗唔係令佢忽然腳痛？所以煲呔健康，唔代表政府強壯，家陣呢個看守政府弱過藥煲，再有任何政治動盪，八方擔心佢下次唔係入醫院，而係要上北京照肺呀！

mailto:[email protected]