呔新屋入伙，反對派民主黨噚日一早就去贈興，運咗盆桔去禮賓府做「送桔黨」。禮賓府有警察叔叔駐守，佢哋梗係唔敢公然勒索，但亦唔會無所求，求乜？當然係減稅派糖。黨員林子健話，估計庫房今年有成百億元盈餘，政府唔應該搵藉口拒絕減稅。
送桔條橋，據說係民主黨單仲偕度嘅，但佢身為尊貴議員，唔會親身運桔，於是就畀啲機會班兄弟曝光，至於盆桔係喺花墟買嘅，煲呔𠵱家有間大屋，大把地方放啦。
講起煲呔，佢前日突然話要畀公務員返五日工，商界被殺個措手不及，因為唔係個個行業都可以只做五日生意，好似自由黨嘅方剛咁，佢做出口成衣，由於時差關係，禮拜六重會有好多電報收，如果星期六冇人返工，好多單就跟唔到。
方剛話，一兩年前已經減少工時，但如果返五日工，就一定會增加成本，唔係話完全冇得傾，但一定要諗諗係咪會影響競爭力呢？而且個個趁longweekend返晒大陸點搞？佢都可能返去打多日波啦！

方剛嘅心情商界中人好明白。中華廠商會新任副會長羅富昌噚日請客，席間講起五日制，佢話一早已領先潮流，部份員工每周只工作四日，但實情係佢經營嘅永富鐵罐廠部份機器二十四小時運作，有啲員工要分兩班十二小時開工，所以先至有返四天工嘅情況出現。
坐喺佢旁邊嘅另一位副會長尹德勝就話，𠵱家喺香港嘅廠唔多，主要都喺大陸，而大陸一早已五天工作，不過員工好多都肯加班，博收加班費，因為班員工多數係外省工人，一心想搵多啲錢返鄉下，所以願意加班。佢又唔贊成強制立法返五日，因為有人將工作當做興趣喎。
八方以為只係商界反對五日制，原來學者都有反對派。科大教授雷鼎鳴話如果只政府每周工作五天，對於整體經濟冇影響；若然全港行五日制，或會令經濟增長減慢甚或下跌。
煲呔一心益公務員，諗住收買下人心，估唔到咁都有咁多反對派，真係意料之外；睇怕要養多幾條錦鯉再擋擋煞。

傳真︰2623-9278
電郵︰[email protected]