灣仔會展前晚上演嘅「王者對決2」，29歲香港不敗拳王曹星如（Rex）對戰31歲日本拳王向井寬史，吸引到狄龍、嘟姐鄭裕玲、任達華、曾江同老婆焦姣、吳雨霏（Kary）孖老公、陳志雲、李克勤夫婦同林海峰等圈中人去觀戰。深夜壓軸上演嘅呢一場矚目拳賽，結果打到第8回合，Rex成功K.O.向井寬史，取得職業生涯第21連勝。拳賽精采，一班藝人都睇得好肉緊，比賽結束後，Kary即刻同老公逼去擂台邊，化身小fans想同星如揮手。狄龍同曾江雖然一把年紀，都捱夜睇晒個比賽，佢哋都舉高大拇指讚星如，狄龍仲話：「棋逢敵手。」
嘟姐更加話睇到胃抽筋：「好緊張、好開心，有一刻覺得自己睇到胃抽筋，覺得日本對手都打得好好，當然阿Rex更加好，覺得Rex係香港嘅英雄。」

Kary：打得好緊張

Kary亦大讚：「打得好緊張呀，好好睇呀。」華哥就讚兩位拳手都打得好：「非常好睇，大家技術發揮得好好，現場好多香港人打氣，最初以為計點數分勝敗，因為頭幾個回合都咬得好緊，日本對手都發揮得好好，𠵱家咁樣嘅結果更開心。」任達華原本想影低星如勇戰嘅過程，可惜入唔到內圍。同星如拍過廣告嘅狄龍，賽前好似爸爸一樣封利是畀星如，星如表示好感動同好感觸。另外，甄子丹亦透過短訊恭賀星如：「恭喜我們的世界拳王！Rex，你是世界之光！」
撰文：馮仁昭