韓國性感歌姬李孝利孖音樂人老公李尚順，及「國民妹妹」IU拍攝嘅JTBC真人騷《孝利的民宿》下周日就會播出最後一集，噚日播出嘅一集中，IU就提及佢個老友兼鄰居劉仁娜。

IU同劉仁娜情同姊妹，不時結伴去旅行，不過IU坦言為咗有私人空間，所以佢哋就冇住埋一齊，當中38歲嘅李孝利得知劉仁娜年齡為36歲(韓國計虛齡，實為35歲)時，即大感驚訝，李孝利話：「我知佢，但佢完全唔似36歲。」大讚劉仁娜夠童顏。而李尚順亦插口就話：「知道個名，我認識嘅哥哥中有個叫劉仁基。」對於李尚順問非所答，李孝利就講笑話自己食過「劉仁基」(韓文諧音油淋雞)。

而節目中，佢哋又提到理想型，當中IU就問李孝利當年邊個男星係理想型，李孝利就話元斌同金來沅，至於甩拖IU雖然之前同姜河那傳出緋聞，不過佢就直言現時冇理想型，不過李尚順就搞笑提議IU可以揀自己，又話：「提我就冇乜負擔。」而李孝利即時寸老公話喺節目中唔可以講大話。

另外，節目PD就透露喺最後一集中，IU有寫信畀李孝利佢哋，令到李孝利感動得眼濕濕，但一直努力忍住眼淚。