草蜢嘅蔡一傑日前涉醉駕被捕，家獲准保釋外出等警方調查，雖然隨時會官非上身，但前晚傑仔仍然開工，返將軍澳無綫電視廣播城錄影《華麗明星賽》，一身鮮黃色西裝上陣，鬼咁搶眼。
當晚傑仔喺鏡頭前同一班嘉賓好似官恩娜、呂慧儀及馬德鐘等玩得好投入。傑仔錄影完後，冇接受訪問由後門離開坐朋友車直接返薄扶林寓所。

被指撬牆腳

事發後傑仔一直未有發言，直至噚日早上佢先喺微博首度表態，佢話：「連日來收到各方好友短訊慰問，感覺溫馨良好！由於現階段已交由警方和司法程序，不方便對外說些甚麼，希望各位傳媒朋友見諒！在此亦多謝各位傳媒朋友連日來東奔西跑，辛苦你們了‥‥‥」另外噚日有報道話傑仔同林一峰陷入三角戀，話佢睇中一峰嘅男友，仲私下講明要撬佢牆腳。
雖然發生涉醉駕事件，傑仔都冇忘記蘇志威噚日生日，前晚陪佢切蛋糕，阿細老婆劉小慧就帶埋囡囡到電視城探班。至於草蜢經理人林珊珊噚日對於有報道指傑仔因同密友張耀揚分開要借酒消愁，佢話：「明知係傳聞，唔使花精神否認。」