敏妮曾經喺專欄提過一位朋友L，即係將資金押晒喺「愛巢」嗰位朋友。
佢上個禮拜五突然SMS敏妮，話香港郵政出咗兔年生肖郵票。敏妮除咗鍾意儲錢，其他冇乜鍾意儲，加上家電郵多過寄信，無啦啦通知敏妮有生肖郵票，莫非佢唔得閒，想敏妮幫佢排隊買？
非也！朋友L話，今次嘅兔年生肖郵票，係12生肖第三輯紀念郵票最後一套，所以有得炒。佢仲提醒敏妮，家陣熱錢多，大陸人連蒜頭都炒得一餐，何況郵票之類本身已經有投資價值嘅收藏品。

大陸人炒賣　似80年代香港

香港嘅兔年紀念郵票有幾大炒賣價值，敏妮要問吓專家，但大陸今個月初發售嘅兔年紀念郵票就炒得好瘋狂。一個郵票由面值1.2元人民幣，炒到最高3蚊，足足1.5倍。
6個郵票合成嘅小版張，面值7個2，兩個星期內最高升5倍，炒到41蚊。話唔定，大陸同胞嚟香港掃名牌嘅時候，順便掃啲香港嘅兔年郵票。
剛過去嘅星期六，TVB《新聞透視》節目訪問老闆黎智英，敏妮當然擔定凳仔睇，有一段講到喺80年代中開始，香港炒賣風氣極盛，其中一幕講92年，一本原價360蚊嘅郵票冊，當日有郵商出暗盤400蚊收購。下一幕，94年，恒生指數由萬二點跌落八千幾點。
任何合法搵錢嘅話題，敏妮都有興趣，但係去到炒郵票呢啲咁「專門」嘅投資，唔係敏妮杯茶。
反而啲前輩成日話，歷史不斷循環，睇番家陣大陸人嗰種投機炒賣嘅情況，同80年代香港又幾相似。

溫敏妮
http://wanmanli.com/blogs/