今日必買

蘋果日報 2002/02/19 00:00


茶葉蛋兩款口味
茶葉蛋做法唔難,但要做得好味就可能會有啲難度,鍾意食茶葉蛋嘅話,介紹呢款由台灣入口嘅即食茶葉蛋畀大家試,有兩種口味,五香味及麻辣味,除咗茶葉之外,成分重包括中草藥、糖、醬油、紹酒、香辛料、辣椒等,食落甘香,蛋又煙煙韌韌,咬感十足,每包內有六隻茶葉蛋,十蚊都唔使,而每隻蛋重係獨立包裝,方便又衞生,攞出街食都無問題,好過自已煮咁麻煩。
消滯荷葉山楂茶
新春期間大家一定食到飽飽滯滯,呢個時候最好飲番杯消滯茶解救。呢款由台灣出產嘅荷葉山楂茶可以話係消滯嘅好幫手。山楂功效開胃消積,荷葉則有清熱消暑作用,兩者配合而成,做成粒粒茶包,只要以熱水沖泡,即溶即可以飲用,簡單而又方便。每盒內有十四小包茶包,而每包大概重2克。
鹹紅豆茸糯米糍
食慣咗甜味嘅糯米糍餡,想唔想轉吓口味試試鹹味嘅糯味糍呢?由日本入口嘅鹹味紅豆茸糯米糍,食落無咁膩,而且糯米皮重有紅豆碎粒,唔單止有煙韌嘅口感,重多咗一啲咬感。除咗紅豆茸,重有芝麻茸供選擇,同樣係鹹味,每件都只係$8;而鍾情甜味糯米糍嘅小記亦有好介紹,新推出嘅枝豆茸餡,比一般食開嘅甜味糯米糍少啲甜,但多啲餡,售價同樣係$8件。

記者:陳冰麗