敵人，是最了解你的人。11.25九西補選民主派敗陣，有民主派歸咎支持者心淡不投票，但在建制派角度，揀錯人才是關鍵。為陳凱欣拉票的工聯會黃國健認為，補選形同單議席單票制，兩陣營務必派出最能吸取基本盤以外選票的人出戰才有勝算，除了馮檢基鎅票因素，工黨李卓人形象舊兼有議會包袱，陳凱欣才能在建制派基本票源未有增長下致勝。不能不說的是，建制陣營的箍票網絡已進化至層層叠，建制派不能說的秘密，就由公民黨油尖旺區議員余德寶一一道來。

記者 許偉賢

「其實唔係建制派（拉票工作）特別好，相信係民主派失策」。翻查年初3.11與年底11.25九龍西補選結果，陳凱欣得票106,457，較民建聯鄭泳舜3.11時得票還少逾千票，但陳最終仍當選，有多年選舉經驗的黃國健指民主派「揀錯人」是致命傷。

黃國健形容李卓人是「老將」，「今次行出嚟畀人感覺係有暮氣，同較年輕活力嘅陳凱欣行埋一齊，有個強烈對比」。輸人之餘亦輸陣，「民主派同時有馮檢基出嚟選，佢（馮）知名度比較高，以前唔少人受過佢幫助，好多街坊對佢有同情分，而李卓人係空降，呢個係比較大嘅失誤」，黃並稱民主派此仗仍然主攻政治牌，「政治牌打得多，市民有厭倦感」，故陳凱欣刻意「純粹民生」，「一句政治都唔講」。

揀錯人是致命傷？答案未必如此簡單，建制派背後的無形之手，還做了甚麼？

「儘管陳凱欣係素人，但起步快過民主派（獲九龍社團聯會委任為健康大使進行宣傳），仲有建制派開足turbo宣傳，其實同民主派動員不相伯仲。」補選期間為李卓人助選的區議員余德寶坦言要承認落敗，並要找出輸的原因，但他指除了建制派所指的人選問題，以及坊間一般指的年輕人、本土派甚至中產選民不投票原因外，不能忽視的是建制派進化至層層叠的箍票佈陣。

以其所屬的富柏選區為例，2015年當選時與今次補選民主派得票作對照，余失票近10%；事隔3年，余發現建制派催票功力又再提升，會以不同組織向選民重重箍票，今次補選前夕，區內便有不少入會表格湧現：「例如你係邊個鄉下，就叫你加入某個同鄉會；其次又有啲地區組織如油旺動力，吸引街坊做會員，仲有其他類近組織，都係喺選舉時大力動員」。

有參加了包括潮州商會及九龍社團聯會等約4個地區建制組織的九西街坊向《蘋果》透露，11.25選舉日接連收到相關組織來電，「全部都係問投咗票未？」她坦言因電話攻勢加上平日有到社團領取禮品「攞着數」，「咁多個電話到，覺得唔投都唔好意思，所以晏晝都有去投票。」

有建制派亦在選舉前透過微博發放過萬訊息拉票，余德寶認為多路進攻，建制派基本盤相當穩固，反而民主派要檢討一貫的模式箍基本盤是否仍有效。他不認同與建制派鬥多「蛇齋餅糭」，「要話畀選民聽，民主都係好重要，唔係單靠民生，政治就可以擺埋一邊」，又指現在是後DQ年代，泛民須積極回應年輕一代訴求。