所謂「冬大過年」，剛過去的冬至市道回暖，有人選擇上酒樓吃冬至飯，亦有人喜歡在家中大顯身手，為家人烹調窩心冬至大餐，《蘋果》巡視港九多處街市發現人頭湧湧，不少市民忙着買雞、買魚，豐儉由人。在觀塘瑞和街街市、一家七口的梁女士預算用1,000元買餸：「會買花膠，海蝦、魚……價錢唔係最重要，最緊要新鮮。」她強調每年在家做冬，兒子新抱全家聚首，開開心心最重要。

記者：金敏琍　邵靖妍　張景昕

在旺角朗豪坊附近的奶路臣街街市人流暢旺，黎太剛在海鮮檔用300多元買了一條生猛海魚及一斤活蝦，她稱今年冬至預了700多元買餸錢，「一陣仲要買鮑魚，年年都要海鮮㗎！」她指，今年「買隻嘉美雞要200幾呀陰公！」她強調，冬至飯要「大魚大肉、滿漢全席咁。」

市民買餸豐儉由人，街市海鮮檔、雞檔和燒味檔的東主忙個不停，瑞和街海鮮檔檔主陳生稱，近一星期市道明顯好轉，但與去年同期比較生意下跌三成，過去市民花600、700元，甚至過千元買海鮮，但「今年冇咁豪，由龍蝦變海蝦，德國鮑變買大連鮑，今年入少咗貴價海鮮如長腳蟹、阿拉斯加蟹，今年入多咗蜆貝類，幾十蚊有交易。」

奶路臣街街市培仔海鮮東主培哥則指，今年市民買餸較「疏爽」，願意買生猛或貴價海鮮，銷情不錯，對年尾市道：「一直冇擔心過！」

雞是冬至飯不可缺少餸菜，不少市民商戶亦買雞還神，旺角雞檔老闆娘香太指「啲人唔會慳買雞，300幾蚊都照買，拜神吖嘛！」她的雞檔以賣嘉美雞、走地雞為主，早前已大批入貨做好準備。

活雞、活魚多人買，相比下燒味檔今年旺丁不旺財，有東主指往年不少人「斬料」買全隻白切雞，但今年只買半隻，「或者買幾樣都係半隻，叫做乜都有，意思意思咁。」而且豬肉價格貴，生意較去年下跌三成，今年亦少了市民訂購乳豬拜神，營業額只能維持。有東主直言：「其實唔加價都已經係減價。」

至於與示威熱點數街之隔的鵝頸橋街市則生意欠佳，70歲肉檔老闆楊先生入行40年，他指早前社會氣氛差，生意下跌三分二，現時雖是冬至旺季，但鵝頸橋街市靠近商業區未有受惠，因為這區街坊多數外出用膳，較少買餸煮飯。不過他們承認近日生意略有好轉，但展望農曆新年，希望生意可以回升。

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568