民主黨本周末改選中委後，今晚中委會互選主要職位。因為連續兩屆出任司庫嘅深水埗區議員袁海文今年要專心湊女同讀書唔再競逐連任，民主黨需要就司庫一職另覓人選。據悉，中委互選之下，由上屆已經退下火線嘅前議員單仲偕，重出江湖執掌財政大權，至於秘書長就由張賢登繼續連任。

除咗秘書長同司庫，中委亦互選出中常委以及各部部長，由於2019年和2020年分別區選同立法會選舉，所以重中之重當然係負責統籌選舉嘅選舉委員會喇。據知選舉委主席要職就繼續由元老李永達出任，而副主席就仍然係單仲偕。佢哋亦都討論埋，若然李永達真係因爲佔中案入獄，單仲偕同副主席羅健熙就會接手主力選舉協調。