文戲可以，武打亦得！蘇亞雷斯啱啱拍完「波監風雲」返嚟，又接咗套武打片，佢喺禮拜一晚主場對熱刺嘅英超比賽入面，使出功夫腳，K.O.柏加，但球證放佢一馬，只係畀張黃牌就算，引嚟朗尼同加利尼維利嘅不滿。
阿蘇麻煩多多，話完艾拉「黑仔」唔認錯，又向富咸球迷舉中指，之前夾埋俾英足總罰佢停賽9場。阿蘇坐咗成個月波監，禮拜一晚對熱刺終於「刑滿」復出。佢下半場後備出場冇耐，就耍番套腿法，盡顯武林巨星的風範，喺禁區爭波嗰陣一腳踢落柏加個肚度。柏加硬接一招後，瞓咗喺地兩分鐘先起得番身，阿蘇就無辜辜咁企埋一邊；而球證網開一面，只罰黃牌。

喺電視睇緊波嘅朗尼㷫過辣雞，喺Twitter度留言：「如果球證睇到呢腳而會畀牌嘅話，呢張應該係紅牌。」至於講緊波嘅曼聯名宿加利仔亦明寸：「阿蘇真係好彩，咁都走得甩！」賽後有記者叫利物浦領隊杜格利殊回應，佢老人家即刻扯火：「邊個講埋呢啲嘢？你好似明知答案咁，點解又唔覆佢？我冇睇過，亦唔會去睇佢哋講咩。如果你叫到加利仔或者朗尼企喺呢度，我先會答！我唔覺得你可以代表佢哋，除非佢哋真係想我答！」
我求大俠睇番場波，阿蘇真係當自己超人打怪獸咁，佢踢完柏加個肚，又插人哋隻眼，但呢吓球證就睇唔到。我醒起，柏加次次都係做俾人恰嘅角色，冇耐前先俾巴洛迪利踩過，今場又食咗阿蘇兩嘢，真係陰公！
講番場波，其實悶戰一場，上半場最令人深刻嘅畫面，係有隻貓仔入咗球場草地行catwalk，之後俾保安哥哥捉走。換邊後，除咗係阿蘇表演功夫嘅舞台，熱刺嘅加里夫巴利都有個單刀射失咗，最終兩隊踢成0:0。翻查數據，利物浦今季12場主場聯賽，竟然有8場和波，可說是成績不振的主因；另外，紅軍也是英超把握力最低的球隊，全季射門393次，得28個入球，成功率得7%。