話咁快2017年又過咗一個月，上個月21號人氣韓劇《鬼怪》圓滿結束，唔少劇迷都好失落，不過今個月都有唔少韓劇出籠，當中就以兩大收費台tvN出品嘅《明天和你》同埋JTBC嘅《大力女子都奉順》最有看頭，唔知到時收視鹿死誰手？0依家睇下今個月有乜嘢韓劇睇。

(一)tvN《明天和你》 2月3號首播
《明天和你》 接檔《鬼怪》後播出，劇集由申敏兒同李帝勳主演，會以先拍後播嘅方式進行拍攝，喺播映前已完成所有拍攝工作，劇集係人氣韓劇《Oh我的鬼神君》嘅導演柳濟元同《陽光滿溢》嘅編劇許星慧打造，講述時間的旅行者李帝勳同妻子申敏兒嘅浪漫愛情故事，題材都幾獨特，唔知會唔會為tvN再創神話？

(二)SBS《超人家族 2017》 2月6號首播
由朴赫權、朴宣暎、金智敏等主演嘅《超人家族 2017》係SBS重新打造嘅情景喜劇，主要圍繞普通上班族、家庭主婦、學生等人嘅日常生活，寫實地描寫現今社會家庭嘅電視劇。

(三)JTBC《大力女子都奉順》 2月24號首播
《Oh我的鬼神君》女星朴寶英夥拍朴炯植同金志洙主演嘅《大力女子都奉順》，改編自同名漫畫，以力大無窮嘅女主角朴寶劍為中心，內容輕鬆惹笑，鍾情浪漫喜劇嘅觀眾就必定追捧。

(四)KBS《完美的妻子》 2月27號首播
韓國型男張東健嘅老婆高素榮事隔十年再拍韓劇，夥拍尹尚賢、盛駿等演員，故事講述一個比「雙失青年」仲慘情嘅「三無主婦」：冇錢、冇愛情、冇福氣嘅女主角高素榮為主，睇佢點樣克服各種危機，估計必定受到愛煲劇嘅師奶觀眾追捧，被視為黑馬。