大陸去年雖然實施咗「禁韓令」，但話禁啫，冇話唔可以抄。

而多個韓國綜藝節目，包括tvN王牌節目《一日三餐》、《尹食堂》、《Show Me The Money》、《孝利的民宿》等，已先後被大陸借來「參考」，照copy製作全新節目，過程中大陸方面完全冇畀錢買版權，令唔少網民都質疑到底大陸電視台有冇人才，點解可以擺明抄襲，唔自己創作。

今日韓國傳媒就報道，愛奇藝方面將會製作全新節目《偶像進化論》，形式上又再涉抄韓國Mnet人氣選秀節目《PRODUCE 101》，當中大陸版就將練習生人數加至111位，當中最終出線者就會組成男團。由於《偶像進化論》公開嘅宣傳片以及節目形式都同《PRODUCE 101》好相似，所以引來韓國方面報道，當中《PRODUCE 101》製作方CJ E&M就表示冇出售過版權畀《偶像進化論》，對於喺冇買版權之下有近似嘅節目，佢哋就表示遺憾。

至於大陸網民都睇過唔過眼，紛紛留言話好丟人，亦覺得節目組完全冇創意，抄襲出來一定唔夠原創好睇。