亞洲區內賽馬高知名度地方離唔開香港、日本，而新加坡、馬來西亞、澳門等屬於次一級地區。其中馬來西亞的雪蘭莪、霹靂同檳城馬場，與新加坡、澳門一樣，都有來自五湖四海之不同國籍騎師搵食。
巴西騎師今年喺亞洲大豐收，莫雷拉在港首度封王，冼文諾亦大有機會連續第二年稱霸星洲，而二人鄉里荷西(JoseBonifacioPEREIRADESOUZA)亦唔執輸，正向住第二度馬來西亞冠軍騎師名銜進發。在當地最新騎師龍虎榜上，荷西咬到地頭蟲哈密星實一實排第二，只落後一場，後者領先優勢唔大，排第三係見習生黃錦昌。
現年35歲之荷西前年11月中曾經參加澳門娛樂展騎師挑戰賽，不過全晚騎五駒零上名空手而回，去年佢大爆發，首奪大馬冠軍騎師寶座，為祖國巴西爭光。