以下呢單嘢，係真心好笑。

一個係黨嘅喉舌、語不驚人死不休，成日批香港人但香港人當笑料嘅《環球時報》，另一個係擁有20,809,204關注嘅大陸知名財經媒體《財經網》。發生乜嘢事？呢兩個大陸傳媒官方微博，竟然喺微博「嗌八婆交」!

先講起因：
話說，《財經網》連日喺微博發佈咗一啲黃安嘅訪問，包括接受網易嘅訪問，《財經網》嘅標題係「黃安：一黨最好，最適合中國人」——拿，成篇訪問其實講咗好多嘢，包括黃安否認遭台灣傳媒杯葛呀、重申冇大陸身份證呀咁。如果俾《環時》出，一定講番佢反台獨乜乜乜，偏偏《財經網》就引用佢講台灣綠藍大戰然後結論係「一黨最好，最適合中國人」，有大陸網民睇唔過眼:「黃安，你是個什麼人呢？按黃的邏輯，成吉思汗及元朝最好，國家最大，最適合中國人？」

亦有撐黃安嘅fans，責問《財經網》:「財經網不提安哥的基本立場是反台獨，卻神奇地抓住他在訪談時談一黨制、多黨制的利弊，大作文章，其用心昭然若揭。」

《財經網》揭黃安嘅好事，一浪接一浪，包括貼埋黃安多年前喺節目《開運鑑定團》嘲諷大陸人「上廁所都不沖大便」，又拎大陸女生貞操開玩笑:「大陸女生的貞操觀念就是：我拿青春賭明天、不給小費算強姦；灑向人間的都是愛，該是幾塊就幾塊；灑向人間都是情，便宜一點行不行！」嘩……都係黑材料嚟0架喎……

於是，又有黃安fans留言喇:「財經網再發有關黃安的微博，就取消關注，支持的頂！」《財經網》小編回覆一句:「好走不送。」型!

跟住發生乜事呢？

《環球時報》官方微博出招。
《環時》小編喺《財經網》post嗰篇「一黨最好，最適合中國人」文章，留言先:「貴網小編這兩天接連兩條關於黃安的微博，一條翻出黃安10多年前揮舞台灣旗的視頻，另一條則是『斷章取義』對黃安的採訪。或許貴網小編是不滿黃安的某些做法？但這麼做，格調有點低。」

《財經網》小編，亦非省油的燈，反擊回道：「呵呵，談格調，貴報小編也配？」

《環時》小編即回覆：「比起貴小編轉發的謠言新聞數來說，小編的『格調』確是不如。」

係咪好似兩個八婆嗌緊交咁？係咪好想加入？有大陸網民就狂鬧《財經網》「挾洋自重」、「抹黑中國」、「自以為是」、「目空一切」……之類啦。

原來《財經網》係「良心傳媒」嚟0架？