運動開始了，罷課不罷學，前進！帶遮上街太暴力，後退！年輕漫畫家周小某親歷超過一個月嘅雨傘革命，回想呢段必定寫入歷史嘅運動，既驚且喜，於是參考康樂棋棋盤，創作咗一幅雨傘運動棋盤，一步一驚心，歡迎大家剪存慢慢玩。
小某話，雨傘運動有好多感動位，呢個月以嚟，街上嘅人無私咁自掏腰包買物資、有時間出時間、有力出力、有錢出錢。大家開始主動關心陌生人，關注到分類減廢嘅重要性，開始注意自己光顧嘅係小店抑或財團：「我會覺得，即使touchwood到最終選舉制度仍舊原地踏步，廣場上香港人嘅公民質素必然已有提升，對日後爭取其他議題都一定有幫助。」

漫畫家：落區睇清事實

支持或反對佔領運動，造成社會上唔少家人同朋友決裂。小某話佢同家人對運動嘅意見都相反，仲試過幾次激辯。佢嘅處理方法係，嘗試鼓勵家人跳出難分真假嘅情報，親身去佔領區同年輕人理性對話，用自己雙眼睇清楚事實，唔好憑自己想像對事情下定論。小某抽過唔少時間去佔領區參與討論，議題包括應否全面開放電車路、對廣場公投睇法等；雖然大家意見不一，但係多討論集思廣益，先可以加快搵到解決方法。
至於運動將會點樣結束，小某話：「我好希望政府可以盡快正面回應我哋嘅不滿，檢討並改善現行制度上嘅偏頗，更希望大家能喺滿意並有共識之下主動離場，留點時間為場地善後。」

李八方
mailto:[email protected]