快將60歲嘅教育學院校長張炳良，盛傳係梁振英政府嘅新局長，極大可能掌管房屋局，噚日張炳良終於打破沉默，公開向傳媒表示，提早半年同教院解約，預備7.1返新工，不過佢死都唔肯講係咪加入梁振英班子。
早喺今年3月，校董會打算同張炳良續約五年，當時張炳良以事業有「新發展」為由而決定唔續約，今個星期一（21日）向校董會遞信，提早半年解約，離開大埔去添馬艦，終於修成正果。校長個位暫由副校長鄭燕祥接波。
近日地獄辦嘅主管羅范椒芬「凶鈴」四起，咁張校長有無接過呢？張炳良話唔講咁仔細，以前都有同羅范傾吓教育議題。教院一年級學生就話，張炳良都未幫教院搞掂「正名」做大學，話走就走，令學生好傷心囉！