憑《拆彈專家》喺今年香港電影金像獎上奪賞得最佳男配角嘅姜皓文(黑仔)，晚上現身大會慶功宴依然難掩興奮之情，問到同時獲兩部電影獲提名，黑仔表示：「起初大家好似鍾意《大樂師》多啲，後來又到《拆彈》多啲人鍾意，我都有諗過會唔會因為咁分薄票源，但 學鄭中基話齋，既然兩部戲都提名到，最緊要平常心好好享受。」

黑仔話其實呢排自己都好忙，一路都無時間諗攞獎，直至頒獎禮前幾日先至開始識得緊張，問到兩套電影中自己鍾意邊套多啲？佢話：「好難比較，始終係兩套唔同嘅電影，不過今次《拆彈專家》入面嘅警察就自己好少地咁有型咁正常，而《大樂師》入面又有好多發揮。」

黑仔話仲要多謝太太殷寧：「呢段時間老婆好辛苦，又要陪我整衫，因為想配合大會青春常駐嘅主題，所以特登搵咗馬來西亞設計師同我設計呢套衫，套衫到噚日仲改緊，今朝出門口前我老婆先至幫我搞好個煲呔。」

但剛才喺台上唔記得多謝太太？黑仔話：「係囉，我自己都唔記得咗，但我老婆就話叫我唔好成日喺出邊講佢，叫我有機會就要多謝同我合作過嘅人同埋老闆，老婆比我更加識大體。」

精選娛聞，喺晒《娛果》
http://fb.com/appledailyent