宇宙巨G.E.M.打破先例，除咗官方攤位賣嘅「太空手帶」之外，其他「螢光燈」嚴禁入場，仲因呢條「太空手帶」嘅定價係全部紀念品當中最貴，價值港幣$280。買咗$898飛嘅觀眾，座位雖然早就擺咗一條「太空手帶」喺扶手位，不過完騷嗰陣，就要歸還手帶。

宇宙巨G.E.M.對於要觀眾歸還手帶、循迴再戴，就話:「當我知道訂價的時候都有問公司，這條太空手帶真的很貴，來價真的很貴，這也算是我們公司的一個投資，我認為投資不會在短期做定論，需要長線。」(新聞連結： http://bit.ly/1xvVRkt )

不過，內地淘寶咩都有價格列晒出嚟，只要㩒個掣，乜都清楚晒。今日有網媒「852郵報」踢爆宇宙巨G.E.M.口中「來貨價很貴」嘅太空手帶，原來淘寶網都有一種類似嘅相關產品，係軟膠發光手帶，仲會閃閃下，賣5蚊人仔（$6.2港元），雖然有多隻色，不過只係可以發出白光，而宇宙巨G.E.M.嘅「太空手帶」就可以變色。

但該報道指喺淘寶搜尋，發現有一款可發出紅橙黃綠青藍紫光彩嘅手帶，港幣$14就買到，本報亦發現有兒童手帶同樣有變色效果嘅相關產品，只係賣1蚊至5蚊人仔不等，即係燈嘅成本唔貴，貴在條手帶嘅設計，包括嗰條塑膠製造嘅「錶帶」，加加埋埋，咁就值$280？

該報道又話，國際搖滾樂隊Coldplay喺2012年試過喺演唱會派發呢類發光手帶，當時佢哋向在場7.5萬個觀眾每人贈送一條手帶，總成本都只係432萬港元，除開每條手帶都係約$58咋！